কোনে কাক উচ্ছেদ কৰিব পাৰে ? ।। নীলিম কুমাৰ ।।

 কোনে কাক উচ্ছেদ কৰিব পাৰে ?

▪️ নীলিম কুমাৰ 

কোনে কাক উচ্ছেদ কৰিব পাৰে

জন্মিছে যেতিয়া এই পৃথিৱীত

এই পৃথিৱী আপোনাৰ

এটি জন্তু অৰণ্যত যেতিয়া জন্মে

কোনে তাক উচ্ছেদ কৰিব পাৰে

অৰণ্যৰ পৰা ?

এহালি চৰাই

প্ৰেম কৰে , বাহ সাজে

কণী পাৰে , পোৱালি দিয়ে

আকাশত উৰে

কোনে উচ্ছেদ কৰিব পাৰে সেই চৰাইক

আকাশৰ পৰা ?

কোনে কাক উচ্ছেদ কৰিব পাৰে

এই পৃথিৱীৰ পৰা ?

জন্মিছে যেতিয়া এই পৃথিৱীত

এই পৃথিৱী আপোনাৰো 

বুলড’জাৰবোৰক প্ৰশ্ন নকৰিব

প্ৰশ্ন কৰক পৃথিৱীক

এই পৃথিৱী কাৰ ? 

কাৰ ?

আকাশে বতাহে পৃথিৱীয়ে

সকলোৱে ক’ব _ জনতাৰ জনতাৰ

জন্মিছে যেতিয়া এই পৃথিৱীত 

এই পৃথিৱী আপোনাৰ 

▪️▪️▪️